Weşanxaneyê Roşna
Weşanxaneyê Roşna 2012 de Dîyarbekir de ronîya û bi giranî kurdîya zazakî de kitaban weşaneno.
Badê ke polîtîkaya girane ya tedakar û zordare ke se serrî ra vêşêr Tirkîya de kurdkî ser o dewam kerdêne bineyke bîye sist, mîyanê sînoranê sîyasî yê Tirkîya de bi lehçeyanê kurdkî kurmanckî û zazakî rojname û kovaran dest pêkerd weşanîyayî. Demeyêk badê pey bitaybetî warê edebîyatî de nuştoxê ke êdî daîmî nusenê vejîyayî meydan. Sey nimûneyî, çarçewaya weşanîyayîşê rojnameyê pancês roje yê safî bi kurdîya zazakî yê yewin Newepelî de ke adara 2011î de Dîyarbekir de dest bi weşana xwu kerd, ancî kovara edebî hunerî Şewçila ya safî bi kurdîya zazakî de gelêk nuştoxê neweyî vejîyayî meydan. Bi taybetî badê ke warê nesrî de dosyayê nê nuştoxan virazîyayî û weşanayîşî rê amade bîyî, Weşanxaneyê Roşna sey îhtîyacêk ame ronayîş.
Weşanxaneyê Roşna ke binê îdareyê nuştox Roşan Lezgînî de xebata xwu dewam keno, hetanî nika 34 bi kurdkîya zazakî, di hebî bi kurdîya kurmancî û yew tirkî pêropîya 37 kitabî weşanayê. Qismêk kitabê ke Weşanxaneyê Roşna ra weşanîyayê hetê wendoxan ra eleqeyêko muhîm dî û sey çapa diyine weşanîyayî.
Seba ke miletêk de şuûr û nasnameyê milî virazîyo xebatê hunerî, bitaybetî zî edebîyat faktorêko zaf muhîm o. Seba virazîyayîşê ziwanêkê krîstalîze û standardî zî edebîyat faktorêko bingeyên o. Weşanxaneyê Roşna bi nê şuûrî kitabanê ke weşaneno de zaf ehemîyet dano bikarardiş û redaktekerdişê ziwanî. Kitabî badê ke edîtorîyêka başkerdişî ra vîyarenê û tekrar tekrar redakte benê, ziwan tede bêqusur beno hema weşanîyenê.
Melumatê têkilîye:
Adrese: Diyar Galeria C Blok Kat: 3 No: 9 Yenişehir/Diyarbakır
Têlefon: 0412 223 03 69
E-poste: rlezgin@hotmail.com
Keyepel: www.zazaki.net
