• Kurdî
  • Türkçe
  • English

Weşanxaneyê Vateyî

vate_resimSerra 1996 de çend kirmancê ke bi kirmanckî nusenê û mintiqayanê cîya-cîyayan ra yê, peytextê Swedî Stockholm de bi nameyê Grûba Xebate ya Vateyî yew grûbe naye ro. Armancê na grûbe standardîzekerdişê kirmanckî bî. Na grûbê 1996 ra heta 2016î 28 kombîyayîşî viraştî. Nê kombîyayîşan de seba rastnuştişê kirmanckî û standardîzekerdişê nuştişê kirmanckî qerarî amey girewtene. Çekuyê kirmanckî yê ke ziwano rojane de zaf yenê gurenayene amey weçînitene û nê çekuyî goreye çend xusîsîyetan seba nuştişê kirmanckî amey standardîzekerdene. Û reyna termanê wareyanê sey sîyaset, huner, hukuk, leşkerî, îdarî, sînema ûsb. ser o xebatî amey kerdene û çekuyê ke ameyê weçînîtene, sey ferheng amey weşanayene. Nê kombîyayîşan de tena çekuy ney, qaydeyê rastnuştişî zî amey dîyar kerdene û bi nameyê Rastnuştişê Kirmanckî sey kitab amey weşanayene. Qerarê ke nê kombîyayîşan de bi no qede ameyê girewtene kovara Vateyî ya ke humara xo ya verêne amnanê 1997 de vejîya de amey neşirkerdene. Kovara Vateyî zî sey sey organê weşanî yê na grûbe 1997 ra heta 2016î 48 hûmarayê xo amey weşanayene.

Weşanxaneyê Vateyî zî sey dewamê na xebate serra 2003 de Îstanbul de seba ke qeraranê na grubê xo rê sey polîtakaya weşanî bigêro û bi nê qeydeyî kitabanê kirmanckî çap bikero, bi nameyê na grûb û kovara Vateyî ame sazkerdene. Serra 2003 ra pey zî kovara Vateyî bi dewreyoke newe Îstanbul de binê banê nê weşanxaneyî de ameye çapkerdene. Hetanî ewro Weşanxaneyî Vateyî 92 kitabî û 28 humarayê kovara Vateyî çap kerdî. Nê kitaban ra 55 teneyî bi kirmanckî çap bîy.

Melumatê têkilîye:

Adrese: Katip Mustafa Çelebi Mahallesi, Tel Sokak No:18, Kat:3 Beyoğlu/İstanbul

Têlefon: 0 212 244 94 14

Navnîşana e-posteyê: kovaravate@yahoo.com
wesanxaneyevateyi@gmail.com