• Kurdî
  • Türkçe
  • English

Kawa Nemir

Helbestkar, çîroknûs, wergêr û edîtor.

Di 29’ê Gulana 1974’an de li Îdirê ji dayîk bû, li Enqereyê di Zankoya Hacettepeyê de û di Zankoya Stembolê de ziman û wêjeya Îngilîzî xwend. Paşê li Stembolê ziman û wêjeya kevin a Yûnanî xwend, lê piştî du salan, di 2002’yan de, ji ber çalakîyên xwe yên peywendîdarî ziman û wêjeya Kurdî, ji zankoyê hate qewirandin. Ta niha di warê çand û wêjeya Kurdî de wî gelek karên girîng kirine. Di navbera 1997’an û 2003’yan de, wekî edîtorê kovara çand, huner û wêjeyê ya mehane Jiyana Rewşenê xebitî, ku 52 hejmarên wê derçûn, her wiha, wekî edîtorê kovara Rewşen-Nameyê ya ku sê hejmarên wê derçûn. Her du kovar jî bi giştî wekî nûnerên hizr û boçûnên serekî yên Nifşa 90’î yan jî Nifşa Rewşenê ya qonaxa wêjeyî tên zanîn, a ku jêderk e bo beşek zore ji kartêkertirîn helbestkar û nivîskarên ciwan ên îro. Di 2003’yan de, Nemir weşanxaneya bi navê Bajar damezirand, armanca kîjanê ew bû ku wergerên bi Kurdî ji wêjeya cîhanê biweşîne. Lê piştî weşandina çend pirtûkan, ji ber sedemên darayî, manewî û tenduristîyî, Bajar bê gav ma ku feramoş bibe. Ta roja îro, Kawa Nemir, bêtirî 7000 helbestên ji Îngilîzî wergerandî jî tê de, berhemên gelek helbestkar, romannûs, çîroknûs û şanonûsên Îngilîz, Emerîkan, Îrlandî û Tirk wergerandine Kurdî. Wî 100 pirtûk wergerandine Kurdî, ta niha 23 ji wan hatine weşandin. Nemir yek ji edîtorên Weşanxaneya Lîsê ye. Bi xwe bi şêweyekî çalak beşdarîyê li şanoya Kurdî dike. Wergera wî, Hamlet, di 2012’an de ji alîyê Şanoya Bajêr a Amedê ve hate berhemhênan, ku wî bi xwe dilqê Şah Hamlet tê de lîst. Wî Mem û Zîna ‘Ehmedê Xanî yê helbestkarê gewre yê Kurd ê sedsala 17’an adapteyî şanoyê kir û ev şanoname di 2014’an de ji alîyê Şanoya Bajêr a Amedê ve hate berhemhênan. Hindek helbestên wî bo Îngilîzî û Kurdî hatine wergerandin. Bi xwe ji 2012’yan û vir ve ye romana bi navê Ulysses a James Joyce werdigerîne Kurdî. Kawa Nemir li Mêrdînê dimîne.

Berhemên wî:

Kurteçîrok:

Çavdêriyên Barbarekî, Weşanên Lîs, 2011

Helbest:

Selpakfiroş, Weşanên Rewşen-Name, 2003 (çapa duyem, Weşanên Lîs, 2014)

Bîşenga Deşta Dûr, Weşanên Lîs, 2006

Salname, Weşanên Lîs, 2009

Bêdengî û Tiştên Din, Weşanên Lîs, 2012

Kevirên Bendewarîyê, Weşanên Lîs, 2015

Werger:

Gilgamêş û Çend Mythosên Din, mîtolojî, Weşanên Jiyana Rewşen, 2000

Mirin Niqutî Dilê Firokevanekî Îrlandî, William Butler Yeats, helbest, Weşanên Sî, 2002

Pêşengno! Lo Pêşengno!, Walt Whitman, helbest, Weşanên Bajar, 2004

Welatê Bejî û Deh Koroyên ‘The Rock’ê, T. S. Eliot, helbest, Weşanên Bajar, 2004

Ji Çîn û Maçînê + Hemû Berhemên Helbestî yên T. E. Hulme, Ezra Pound & T. E. Hulme, helbest, Weşanên Bajar, 2005

Sisli Şehir, Jan Dost (wergera romana bi navê Mijabad bo Tirkî), Weşanên Beybûn, 2006

Pûşpera Gêlazan, Mehmet Çetin, (li gel Lal Laleş), helbest, Weşanên Lîs, 2008

The Complete Sonnets of William Shakespeare / Hemû Soneyên William Shakespeare, Îngilîzî-Kurdî, helbest, Weşanên Lîs, 2010

Diyarbekir El Sallıyor/Diyarbekir Dest Li Ba Dike/Diyarbakir is Waving Its Hands, Şeyhmus Diken, (pirtûka sêzimanî, wergera wê ya ji Tirkî bo Îngilîzî û Kurdî), danasîna bajêr, Weşanên Lîs & Weşanên Şaredarîya Sûrê, 2011

Taxa Filla, Mıgırdiç Margosyan, kurteçîrok, Weşanên Lîs & Weşanên Şaredarîya Sûrê, 2011

Beth-Nahrin, Naûm Faîq (berhevoka bendên Naûm Faîq ê rewşenbîr û nivîskarê Suryanî yê navdar, bi zimanên Kurdî, Tirkî û Suryanî), bend, Weşanên Lîs & Weşanên Şaredarîya Sûrê, 2011

Ev nameya min e ji Cîhanê re, Emily Dickinson, helbest, Weşanên Lîs, 2011

Hamlet, William Shakespeare, şano, Weşanên Lîs, 2013

Xewna Şeveke Havînê, William Shakespeare, şano, Weşanên Lîs, 2013

Piling, William Blake, helbest, Weşanên Lîs, 2013

Erdên Bihuştê yên Winda, Yavuz Ekinci, ji Tirkî bo Kurdî, roman, Weşanên Doğan Kitap, 2013

Tramwaya Viyanê, Tennessee Williams, şano, Weşanên Şanoya Bajêr a Amedê, 2013

Siwarên Reş Ji Pişta Behran Hatin, Stephen Crane, helbest, Weşanên Lîs, 2014

Bartlebyê Nivîsevan, Herman Melville, novel, Weşanên Lîs, 2014

Şêweyên Dîtinê, John Berger, huner, Weşanên Akademîya Sînemayê ya Rojhilatê Navîn, 2015

Stranên Evînî, Sara Teasdale, helbest, Weşanên Lîs, 2015

Pen Li Seyrangehê, Raşel Meseri, pirtûka zarokan, Weşanên Habitus Kitap, 2015

Xelatên ku wî wergirtine:

Xelata Ziman a Feqî Huseyn Sağnıç, 2010

Zanyarîyên ragihanê:

Navnîşana e-posteyê: kawanemir@gmail.com