• Kurdî
  • Türkçe
  • English

11. Festîvala Wêjeyê ya Malta Deryaspî

11. Festîvala Wêjeyê ya Malta Deryaspî

Mukadder Ezel Yılmaz, DSM

Em li meha Tebaxê, bi kordînasyona Literature Across Frontiers’ê û wek endam û mêvanê platforma Literary Europe Live’ê (LEul) ku hem-fînasorê wê Bernameya Afirîner a Ewropa ye,  beşdarî 11. Festîvala Wêjeyê ya Malta Deryaspî  bûn ku di navbera 25 – 27’ê Tebaxa 2016’an de li Keleha dîrokî ya bi navê St. Elmo pêk hat. Ew festîval, ku bi înîsiyatîfa wêjevanên Maltayî ji hêla komeke dildaran tê birêxistinkirin, ji aliyê saziya bi navê Inizjamed a ku endamê Platforma Literary Europe Live e tê sazkirin. Festîval di heman demê de ji hêla hin saziyên niştecihî yên çand-huner û wêjeyê jî tê piştgirîkirin.

Beriya çalakiyên sereke, bi xwendinên nivîskaran û hevpeyvînan ên li şûnwarên cihê yên giravê pêk tên hewaya festîvalê xwe dide hestkirin. Şeva Mîkrofona Vekirî ku sehneyek vekirî pêşkêşî wêjevan û wêjehezan dike yek ji wan çalakiyan e ku wêjehez herî zêde bala xwe didinê. Her wisa kargeha wergerê ya girtî ku sê rojan didomîne û wêjevanên wek mêvanê festîvalê hatine vexwendin beşdar dibin beşeke girîng a bernameyê ye. Modela kargeha wergerê ya ku ji hêla Literature Across Frontiers’ê ve ji sala 2001’an û pê de li 21 welatên cihê, bi 57 zimanên cihê û ji 80’yî zêdetir caran hatiye lidarxistin ji wergerandina bi nîqaş a berhemên hev û din ê nivîskar û helbestvanên wergêr pêk tê. Cara dawîn jî li festîvala Malta’yê, ji bo kargeha ku bi rêveberiya  Keith Borg û Nadia Mifsud dihat lidarxistin Samantha Barendson (Fransa), Roja Chamankar (Îran), Rodolfo Häsler’ê Kubayî ku li Barselona’yê dijî, Elias Khoury (Lubnan), nivîskar, helbestvan û wergêrê Kurd Ciwanmerd Kulek, Marc Nair (Sîngapur), Abderrahim Sail (Fas) û ji Malta’yê Joe P. Galea, Daniel Massa, Rita Saliba, Mark Vella û Abigail Ardelle Zammit hatibûn vexwendin. Seranserê kargehê, wek xwîner, çavdêrîkirina nîqaşên nivîskar û helbestvanan ên  derbarê berhem û wergerên wan kêfxweşiyeke mezin da me. Yek ji destketiyên vê kargeha wergerê, ku hilberînerên wêjeyê ji hêla zêdekirina motîvasyona hilberînê û çêkirina torê xwedî dike, derketina berhemên şênber e. Her wiha mirov dikare bibêje ku kargeh bi rêya pêkanîna hevkariyên nû derfetê çêdike ku nivîskar û helbestvan bi awayekî rasterast di wergerandina berhemên xwe yên bi zimanê din de rolekê bileyîzin. Hevkariya Joe P. Galea û Abigail Ardelle Zammit’ê ku ji bo kargeha wergerê ya di çarçoveya 11. Festîvala Wêjeyê ya Malta Deryaspî de bi hev re re xebitîn û xebatên xwe kirin pirtûk mînakek kartêker a hevkariyên bi vî rengî ye.

Yekem pêşkêşiya li Ewropa’yê ya malpera torê ya KurdîLît’ê jî di nav bernameya Festîvala Wêjeyê ya Malta Deryaspî de 26’ê Tebaxa 2016’an roja Înê saet 19.00’an pêk hat. Ji bo me pir girîng bû ku em KurdîLît’ê cara yekem di qada navnetewî de bikarin pêşkêş bikin, ku ji bo dîtbariya wêjeya Kurmancî û Kurdî ya li Tirkiyê pêk bîne derketiye rê. Her wisa wek koma KurdîLît’ê me yekem hevnasîna xwe ya bi saziyên wêjeyê yên endamê LeuL’ê re di çarçoveya vê festîvalê de pêk anî. Di civîna platformê de ku nûnerên saziyên endam beşdar bûbûn, sala li paş mayî hat nirxandin û fikr û pêşniyarên ji bo sala bê hatin parvekirin. Di vê civînê de tişta ku ewilî bal kişand ser xwe ew bû ku kêmbûna pıştgiriya madî û manewî ya saziyên dewletan û saziyên taybet ên fonan a ji bo çalakiyên çand û hunerê û bi taybetî jî ji bo wêjeyê wek pirsgirêkek hevpar a li çar aliyê cîhanê li holê bû. Dîsa saziyan ragihandin ku wan bi piştgirêyên ji LEuL’ê wergirtî karîne çalakiyên xwe li dar bixînin. Ji bo me pir sirûşkar bû ku me dît ji bo qada çand û hunerê parvekirina wan ceribandinan, avakirina hevkariyên navnetewî û çêkirina toran çiqas girîng e.

Komîteya sazkar a Festîvala Wêjeyê ya Malta Deryaspî piştî festîvalê dest bi xebatên ji bo sala 2017’an kir. Festîvala ku dê li kelata St. Elmo pêk were dê 24’ê Tebaxa 2017’an roja Pêncşemê dest pê bike û 26’ê Tebaxa 2017’an roja Yekşemê jî dê bi dawî be. Çalakiyên pêş ên festîvalê jî dê 21’ê Tebaxa 2017’an roja Yekşemê dest pê bikin.

Ji bo bêtir agahiyên derbarê festîvalê: https://inizjamedmalta.wordpress.com/

Ji bo bêtir agahiyên derbarê Platforma Wêjeyê LEuL’ê: http://www.lit-across-frontiers.org/literary-europe-live/

Endamên LEuL’ê: http://www.lit-across-frontiers.org/literary-europe-live/members/