• Kurdî
  • Türkçe
  • English

Tîroj

TIROJ_resimHejmara pêşîn a kovara wêje, çand û hunerê Tîrojê di Newroza sala 2003’yan de derket. Kovar her ji du mehan carekê derdikeve. Yek ji sedemên bikaranîna Tirkî li gel Kurdî ew e ku kovar rastîya Kurdan ji Tirkan re vebêje. Her wiha, ji ber ku di nava Kurdan de jî xwendin û nivîsîna bi Kurdî kêm e, kovar bi şêweyekî duzimanî derdiçe. Di nava demê de û li gorî belavbûna bikarhatina Kurdî, hedefeke ‘sazkar’ heye ku Tîroj bi tevayî bi Kurdî derkeve.

Tîroj xwe wekî ‘kovara polîtîka, çand û hunerê’ bi nav dike, lê çarçoveya xwe di wateya teng a çand û hunerê de sînordar nake. Ew lê dixebite ku heman giranîyê bide ser polîtîkayê jî, ji ber ku têkilîyeke teqez di navbera wan de heye. Bi kurtasî, Tîroj di çarçoveyeke bi Kurdî de hewildana bibîranînê, bibîrxistinê û bibîrketinê dide. Di rûpelên xwe de cî dide çanda neteweyî ya Kurdan ku bi salan e di nava lepên polîtîkayên bişavtinê de ye. Armanca wê bi vê yekê ew e ku geşedanê di vê çandê de çêke û hem jî neteweyên din vê çandê nas bikin. Mîsyoneke wisa pêwîst dike ku li hemberî hizra yekşêwetîyê ya desthilatdar cihêrengîya çandî wekî dewlemendîyê bibîne. Tîroj wekî kursîyekê ye ji bo nivîskar, hunermend û rewşenbîrên her neteweyê yên ku xwedanê vê hişmendîyê ne.

Eşkere ye ku têkoşana li dijî hizra yekşêwetîyê ya bişavtinê û çewisandinê ne bi tenê rizgarkirina îro û dahatûyê ye, wisa jî rizgarkirin û qezenckirineveya rabirdûya hevbeş û nirxan e. Bêyî van tiştan, gotina ‘nirxên hevbeş’ bi tena serê xwe dibe gotineke geşbînîyê. Divê bê gotin, geşbînîya ku neyê nik têkoşanê, gelek caran bi tenê wekî ’temaşekirina li rewşê’ dimîne. Lêbelê Tîroj amûreke wisa ye ku dikare di cîhana wan kesan de tevkarîyê çêke ku xewna pêkvejîyana gelan dibînin.

Kartêkertirîn rêya ku rastîya berbiçav bîne nik ‘geşbînî’yê ye, her wiha birêxistinkirina xeta çareserîyê ya derdorên civakî yên ku pêwîstîyê bi azadî, aştî û demokrasîyê dibînin. Tîroj dikare di destên wan de û li gel wan bibe hevrê ku girîngîyê didine vê hevdîtinê.

Tîroj di sêrî de 64 rûpel bû. Di nava demê de wê du caran rûpelên xwe zêde kirin û herî dawî 80 rûpel derdiçe. Tîroj ji hêla tora belavkirinê ya PUNTOyê ve tê belavkirin. Her wiha bi rêya kargoyê û posteyê bo pirtûkfiroşan û ji bo belavkirina bi destan bo hin navnîşanan tê şandin. Dîsa sîstema wê ya abonetîyê jî heye. Kovar bi rêya posteyê yan jî kargoyê bo aboneyan tê şandin.

Tîroj 14 sal e bi weşana xwe berdewam e bêyî ku navbirrîyê bide. Kovarê di nava 14 salan de bêtirî 70 dosyeyên li ser babetên cihêreng weşandin. Vê yekê jî hiştîye ku Tîroj bi hejmara xwe ya 80. ve di nava kovarên bi Kurdî de bibe birêkûpêktirîn weşan.

Edîtor: Songül Özkan

Zanyarîyên peywendîyê: 

Navnîşan: Tarlabaşı Bulvarı, Kamerhatun Mahallesi, Alhatun Sk. No:25 Beyoğlu/İstanbul 

Têlefon: 0 212 255 25 46

Faqs: 0 212 255 25 87 

Navnîşana e-posteyê: tirojdergisi@gmail.com 

Malper: www.tiroj.net